Month: December 2022

பல்லவி
வருக வருகவே அனைவரும் வருகவே
பருக பருகவே தமிழிசை அமுதம்

அனுபல்லவி
எண்பதாம் இசைவிழா தமிழ் இசைச் சங்கத்தில்
பண்களின் ஆராய்ச்சி இராஜா அண்ணாமலை மன்றத்தில்
தமிழ் இசைச் சங்கத்தில் வருக

சரணம்
சந்தமிகு செந்தமிழ் பாடல்கள் ஆடல்கள்
பண்ணிற்கு இணையான இராகத்தின் தேடல்கள்
தன்னிகர் இல்லாத தமிழ் இசை ஓங்குக
இன்பமிகு இன்னிசை அனைவரும் பாடுக
……… வருக

–பேரா.முனைவர் வே.வெ.மீனாட்சி ஜெயக்குமார்

பல்லவி
அருணோதயம் வருகவே வருக
இருள் அது நீங்கி நல்ஒளி பரவ – அருணோதயம்

அனுபல்லவி
தருமம் பெருக நல்வாழ்வு சிறக்க
பெருமை அது பொங்க பேதமை நீங்க – அருணோதயம்

சரணம்
அரும்பணி பல செய்ய ஆத்ம பலம் உயர
ஆருயிர் அனைத்தும் அன்புடன் திகழ
இருப்பதைக் கொண்டு நிறைவுடன் வாழ – இனி
வரும் நாட்களில் அமைதியும் வளர – அருணோதயம்

–பேரா.முனைவர் வே.வெ.மீனாட்சி ஜெயக்குமார்

அன்றும் இன்றும் என்றுமுள்ளது இசை
ஆரவாரமில்லாமல் அமைதியாய் ஒரு மின்னிதழ்
இசை ஆரம் என்ற பெயர் கொண்ட இம் மின்னிதழ்
ஈசன் அருளாலும் ஆன்றோர் ஆசியாலும்
உலகெலாம் சென்று இசை ஆய்வு செய்வோரை
ஊக்குவித்து புதிய புதிய ஆராய்ச்சிகள் மலரவும்
எண்ணத்திலும் எழுத்திலும் இசை நடன சார் எழுச்சியும் எழ
ஏற்றமான பங்களிப்பு அளித்திடும் இசை ஆரம் என்பதில்
ஐயமில்லை ஐயமில்லை ஐயமேயில்லை
ஒருமருந்தாம் இவ்வுள்ளத்திற்கும் உணர்விக்குமானது இசை
ஓங்கார பரமன் வடிவான இசையை பயில்வோம்
ஔவைத்தமிழின் இசையை இசை ஆரத்தில் வாசித்து பயன் பெறுவோம்.

பேரா.முனைவர் வே.வெ.மீனாட்சி ஜெயக்குமார்