Articles on music, spirituality, self development and humor
அஞ்ச மாட்டேன் இனி அஞ்ச மாட்டேன்
எடுப்பு
அஞ்ச மாட்டேன் இனி அஞ்ச மாட்டேன்
அஞ்ச மாட்டேன் எதற்கும் அஞ்ச மாட்டேன்
தொடுப்பு
கொஞ்சி பேசும் வள்ளி மணாளன் முருகனிடம்
தஞ்சமென்று சேர்ந்து விட்டேன் நான் – எனவே
முடிப்பு
பஞ்சு போல் பறந்திடும் பாவங்கள் எல்லாம்
எஞ்சி இருப்பது பண்ணிய புண்ணியங்கள் தானே
காஞ்சி வாழ் மஹா பெரியவா அருள் உண்டு என்றும்
வாஞ்சையுடனே அவர் உடன் காப்பார் எனவே
– அஞ்ச மாட்டேன் இனி அஞ்ச மாட்டேன்
Prof. V. V. Meenakshi Jayakumar
மனம் உருகுதையா
எடுப்பு
மனம் உருகுதையா – உன் பெயர் கேட்டாலே – என் மனம் உருகுதையா
தொடுப்பு
வனம் செல்ல தேவையில்லை – உனை துதிக்க
மனம் அதை அடக்கினாலே போதும் – என்
முடிப்பு
இனம் அதை நாடாமல் – அலையும் மனமே
கனம் பொருளும் தானே வரும் – உன் பெயர் துதித்தால் போதுமே
சனமும் புகழும் தன்னாலே தேடி வரும் உன் பெயர் துதித்தால் போதுமே
தனமும் அழகும் தானே வரும் – உன் பெயர் துதித்தால் போதுமே
Prof. V. V. Meenakshi Jayakumar
தெய்வத் தமிழ் மொழி
அருமைத் தமிழ் மொழி
ஆன்மீகத்தின் அருள்மொழி
இயல் இசை நாடகம் கொண்ட மொழி
உயர்ந்த தமிழ் இது
ஊமையையும் பேச வைக்கும்
எண்ணெழுத்துக் கொண்டது
ஏற்றமளிப்பது
ஐங்கரன் தம்பி மொழி
ஒப்பில்லாத தமிழ்
ஓங்குமிசை கொண்ட தமிழ்
ஔவை தெய்வமாம் முருகன் பெயர் கொண்ட மஹா பெரியவா தெய்வத்தின் குரலாய் ஒலித்த மொழி..
தமிழே.. தமிழே.. அன்னையே.
உன்னை வணங்கி வாழ்த்துகிறேன்..
எங்கள் எண்ணத்திலும்,
நாவிலும் செயலிலும் வந்து வாழ்வருள்..
Prof. V. V. Meenakshi Jayakumar
தீபம்
அழகு தீபம் ஏற்றி போற்றுவோம்
ஆன்மீக தீபம் ஏற்றி போற்றுவோம்
இல்லம் தோறும் அல்லல் தீர நல் தீபம் ஏற்றுவோம்
ஈசன் முழு வடிவான தீபம் ஏற்றுவோம்
உயர்ந்து ஒளிவீசும் தீபம் ஏற்றுவோம்
ஊக்கமுடன் உற்சாக தீபம் ஏற்றுவோம்
எண்ணத்தில் அன்பெனும் தீபம் ஏற்றுவோம்
ஏற்றம் பெற்று நன்கு வாழ தீபம் ஏற்றுவோம்
ஐயன் அண்ணாமலையானுக்கு தீபம் ஏற்றுவோம்
ஒரு பதினோரு முறை அண்ணாமலையானுக்கு அரோகரா என்றோதி தீபம் ஏற்றுவோம்
ஓம் தீப மங்கள ஜோதி பாடி தீபம் ஏற்றுவோம்
ஔவை தெய்வம் வடிவில் வந்த காஞ்சி மஹா பெரியவர் சொன்னபடி அன்றாடம் தீபம் ஏற்றி தேவாரம் பாடுவோம்.
Prof. V. V. Meenakshi Jayakumar
அனுமன்
அஞ்சனை மைந்தன் அனுமன் அவன்
ஆதி சிவனின் அம்சமவன்
இந்துஸ்தானி இசையின் தந்தை அவன்
ஈரெழுத்து மந்திரத்தின் சொந்தமவன்
உண்மை பிரம்மசாரியவன்
ஊதிய தாடை கொண்டவனாம்
எதிலும் எங்கும் இராமனையே
எப்போதும் காணும் கண் கொண்டவன்
ஏழு பிறப்பில்லா சிரஞ்சீவி அவன்
ஐயன் இராமனே அவன் கடவுள்
ஒருமுகப்பெற்ற உள்ளம் கொண்டவன்
ஓங்கி பறக்கும் கொடியில் இருப்பவன்
ஔவை தெய்வமாம் பிள்ளையாருடன்
ஆதிஅந்த பெருமாளாய் அருள்புரிபவன்
காஞ்சி மஹா பெரியவா கண்டுரைத்த மடத்தின் எதிர் தூணில் ஆசி அருள்பவர் ஜெய் அனுமான்
Prof. V. V. Meenakshi Jayakumar
நதி
காட்டோரம் ஒரு நதி
காடுகாக்கும் நல்ல நதி
காடுபாக்க போகையிலே
காடுபாக்க போகையிலே – இந்த
காதற் பாட்டு வந்துடுச்சி
தன்னானானனானே தன தன்னானானனானே
காசு பணம் வேணாமின்னு
காதோரம் சேதி சொல்லி
கால் நடையா நடந்து வந்தேன்
கால் நடையா நடந்து வந்தேன் – நான்
காதல் நதியே உன்னைத் தேடி
தன்னானானனானே தன தன்னானானனானே
காலை மாலை இரண்டு வேளை
காவற்காக்கும் சூரியனே
காக்க வரும் சாமி நீயே
காலமெல்லாம் நல்லா வாழ
ஆசி ஒன்னு சொல்லு நீ
ஆறுதலா நில்லு
Prof. V. V. Meenakshi Jayakumar
கிளி
ஆத்தோரம் ஆலமரம்
அதிலேவொரு நடு கிளை
அங்கவொரு கிளிக் குஞ்சு
அழகு கொஞ்சும் சின்னக் கிளி
அந்த கிளி பறந்து பறந்து
அம்மன் மேல அமர போகும்
அந்த கிளியாக நானிருக்க
அம்மா எனக்கு வரங்கொடு
Prof. V. V. Meenakshi Jayakumar
கண்ணன்
கண்ணன் கையில் குழலாவேன் – நான்
கண்ணன் கையில் குழலாவேன் – என்
எண்ணங்கள் அனைத்தையும் அவனிடம் தந்து
குழலைப் போல் நான் உள்ளொன்றும் கொள்ளேன்
மண்ணைத் தின்று உலகம் படைப்பான் – என்
மனதைத் தின்று உவகை கொள்வான்
பண் கொண்டு பாடும் எந்தன் குரலில்
தேனாய் வந்து இனிமை கொடுப்பான்
விண்ணையும் மண்ணையும் காலால் அளப்பான்
வீணையில் இசையாய் என் வசம் வருவான்
அண்டமும் பிண்டமும் அவனே என்ற
உண்மையை எனக்கு அனுதினம் உரைப்பான்
Prof. V. V. Meenakshi Jayakumar
ஆடுவோமே பள்ளு பாடுவோமே
பல்லவி
ஆடுவோமே பள்ளு பாடுவோமே – நாம்
அனைவரும் தடுப்பூசி போட்டு விட்டோம் என்று – ஆடுவோமே
அனுபல்லவி
எங்கும் கொரோனா என்பதே பேச்சு – நாம்
எல்லோரும் பயப்பட வேண்டியதாச்சு
தடுப்பூசி என்பது தடுப்பதற்கே அது போல்
முகக்கவசம் கூட அவசியமே..
சரணம்
முகச் சுத்தம் கைச் சுத்தம் பேணிக் காப்போம் – நாம் (2)
அடிக்கடி கைகளை சுத்தம் செய்வோம்
கூட்டமுள்ள இடங்களுக்கு செல்ல மாட்டோம்
தேவையின்றி வெளியில் வர மாட்டோம்
நாமிருக்கும் இடத்தை சுத்தமாய் வைப்போம்
அதைப் போல் மற்றவருக்கும் உதவிடுவோம்
தனிநபர் இடைவெளியை கடைப்பிடிப்போம்
கொரோனா இல்லாத தேசத்தில் வாழ்ந்து காட்டுவோம்
Prof. V. V. Meenakshi Jayakumar
அன்னாபிஷேகம்
அன்னாபிஷேகம் கண்டவர் கலி தீரும்
ஆண்டவன் நமக்கு அருள் தரும் நாள்
இந்த நாளில் இந்த அன்ன கோலத்தில்
ஈசனைக் கண்டால்
உண்மை பொருள் சேரும்
ஊழ்வினை அகலும்
எண்ணியதெல்லாம்
ஏற்றபடி நடக்கும்
ஐங்கரன் தந்தை நம்மை என்றும் காப்பான்
ஒரு நூறு ஜென்ம பாவம்
ஓடியே போகும்
ஔடதமே இப்பிறவி பிணிக்கு அன்னாபிஷேகமே..
காஞ்சி மஹா பெரியவர் அருள் என்றென்றும் நமக்கு இருக்கட்டும்.
Prof. V. V. Meenakshi Jayakumar